អគ្គីភ័យឆេះរោងសិប្បកម្មផលិតទឹកកក នៅគល់ស្ពានបន្ទាយប្រិយ ភូមិចុងអូរ ឃុំសំរុង
20-November-2017 | ដោយ ពលមនសិការ
ព្រះសីហនុ ៖ កាលពីវេលាម៉ោង១២និង៥៥នាទី ថ្ងៃទី១៩ ខែវិច្ឆិកា ឆ្នាំ២០១៧នេះ មានអគ្គីភ័យមួយកើតឡើងបណ្តាលឲ្យឆេះរោងសិប្បកម្មផលិតទឹកកក មួយកន្លែង នៅភូមិចុងអូរ ឃុំសំរុង ស្រុកព្រៃនប់ ខេត្តព្រះសីហនុ តាមផ្លូវជាតិលេខ៤។
លោកវរសេនីយ៍ទោ ហ៊ឹម សុធារ៉ា នាយរងការិយាល័យបង្ការនិង ពន្លត់អគ្គីភ័យខេត្តព្រះសីហនុ បានឲ្យដឹងថា គ្រោះថ្នាក់នេះបណ្ដាលមកពីផ្ទុះធុងហ្គាស ហើយឆេះរាលដាលដល់ស៊ីទែនស្តុកប្រេង និង អគារតែម្តង។
លោក ហ៊ឹម សុធារ៉ា បានបញ្ជាក់ថា ទីតាំងកើតហេតុស្ថិតនៅក្នុងឃុំសំរុង ដែលឃ្លាតពីទីក្រុងព្រះសីហនុ ចំងាយជាង៣០គីឡូម៉ែត្រ និង ឃ្លាតពីអធិការដ្ឋាននគរបាលស្រុកព្រៃនប់ ប្រមាណ១០គីឡូម៉ែត្រ។
ក្រោយពេលទទួលបានព័ត៌មាននេះភ្លាម រថយន្តពន្លត់អគ្គីភ័យ ៣គ្រឿង របស់ស្នងការដ្ឋាននគរបាលខេត្តព្រះសីហនុ និង១គ្រឿងទៀត របស់នគរបាលស្រុកព្រៃនប់ បានចេញធ្វើអន្តរាគមន៍ ទៅសង្គ្រោះពន្លត់ភ្លាមៗ ហើយបានរលត់ទាំងស្រុង នៅវេលាម៉ោង១៤និង៥៥ នាទី ដោយប្រើប្រាស់ទឹកអស់៥ឡាន ក្នុងនោះទឹកលាយសាប៊ូ៤ឡាន ។
ម្ចាស់រោងសិប្បកម្ម ឈ្មោះ ជា ប៊ុនថន ភេទប្រុស អាយុ៥២ឆ្នាំ បានប្រាប់សមត្ថកិច្ចថា៖ មុនពេលកើតហេតុមានភ្លៀងធ្លាក់ ហើយមានរន្ទះបាញ់ត្រូវចំខ្សែភ្លើង រួចឆ្លងចរន្តអគ្គិសនី មកឆេះធុងហ្គាសចំនួន២ បណ្តាលឲ្យផ្ទុះឆេះរាលដាលតែម្តង ។
សម្ភារៈខូចខាតរួមមានៈ ឡានកូរ៉េដឹកទំនិញមួយគ្រឿងចំណុះ២,៥ តោន ម៉ាកហ៊ីយ៉ាន់ដាយ, ទូរដាក់កុងទ័រភ្លើងចំនួន៨ទូ, ឆេះដំបូលរោងចក្រ អស់ប្រហែល៣០%, ឆេះលុយចំនួនជាង៣០លានរៀល និង ប្រេងម៉ាសូតប្រមាណ ៣,០០០លីត្រ ។
លោកវរសេនីយ៍ទោហ៊ឹម សុធារ៉ា បានបញ្ជាក់បន្ថែមថា៖ ក្នុងអំឡុងពេល កំពុងប្រតិបត្តិការ ពន្លត់អគ្គីភ័យនេះ ក៏មានវត្តមានឯកឧត្ដមយន្ត មីន អភិបាលខេត្តព្រះសីហនុ និង លោកឧកញ៉ា ទៀ វិចិត្រ បានមកដល់ឃើញហេតុការណ៍ជាក់ស្តែងផងដែរ។ ពេលនោះលោកឧកញ៉ា ទៀ វិចិត្រ ឃើញបងប្អូន សមត្ថកិច្ចយើង ខិតខំប្រឹងប្រែងបំពេញការងារ ដោយមិនខ្លាចការនឿយហត់នឿយ លោកបានជួយឧបត្ថម្ភដល់ ភ្នាក់ងារពន្លត់អគ្គីភ័យ ក្នុង១ក្រុម ឡាន១ចំនួន៣០០ដុល្លារ មានឡាននគរបាល៣គ្រឿង និងកងរាជអាវុធហត្ថ១គ្រឿង។
ឆ្លៀតឱកាសពេលនេះ លោកវរសេនីយ៍ទោ ហ៊ឹម សុធារ៉ា នាយរងការិយាល័យបង្ការនិងពន្លត់អគ្គីភ័យខេត្តព្រះសីហនុ តំណាងឲ្យមន្ត្រីជំនាញពន្លត់អគ្គីភ័យទាំងអស់ សូមគោរពថ្លែងអំណរគុណយ៉ាងជ្រាលជ្រៅ ចំពោះសណ្តានចិត្តសប្បុរសធម៌របស់លោកឧកញ៉ា និងសូមជូនពរដល់លោកឧកញ៉ា សូមទទួលបាននូវពុទ្ធិពរទាំង៤ប្រការ ៕
ចំនួនអ្នកទស្សនា
- ថ្ងៃនេះ2301
- ម្សិលមិញ10851
- សប្តាហ៍នេះ68821
- ខែនេះ183971
- ឆ្នាំនេះ183971
- សរុប20626427